Ambasadori William Walker ka folur për gjykimin në Hagë të krerëve të Ushtrisë Çlirimtare të Kosovës.

Ai thotë se është i mllefosur nga këmbëngulja e ndërkombëtarëve që të ketë një prokuror special për të shqyrtuar krime të pretenduara nga UÇK.

Walker ka shtuar se dihet se kush ka kryer krime lufte në Kosovë, dhe ata janë trupat, policia e ushtria serbe.

“Jam shumë i mllefosur nga këmbëngulja e bashkësisë ndërkombëtare që të ketë një prokuror special në Hagë për të shqyrtuar krimet e luftës të kryera nga UÇK-ja dhe duke pretenduar se Hashim Thaçi ishte komandant suprem i UÇK-së. Shumica dërrmuese e krimeve të luftës që janë kryer këtu janë kryer nga trupat serbe, policia serbe, ushtria serbe dhe njësitë speciale serbe”, ka thënë Walker për “The Geopost”.

Ai ka thënë se zinxhir komandues kishte në qeverinë e Millosheviqit, dhe jo në UÇK.

Në krye të zinxhirit komandues të Millosheviqit, ishte Vuçiqi, andaj sipas Walker, duhet të ketë Gjykata Speciale edhe për të.

“Vuçiq ishte në zinxhirin komandues të qeverisë së Millosheviqit, kur do të kenë një Gjykatë Speciale për ta, ky ishte një zinxhir i vërtetë komandues. UÇK-ja realisht nuk e kishte, ishin të çorganizuar, njëri komandant ishte në Pejë, tjetri në Podujevë, nuk ishin zot lufte, por e kishin nën kontroll zonën e tyre, nuk merrnin urdhra. Pra, gjërat e këqija që ndodhën më pas, mendoj se i bënë civilët që u kthyen këtu, ata panë se çfarë kishte ndodhur me fshatin e tyre, nuk u pëlqente dikush që ishte bashkëpunëtor ose që kishte marrë pjesë në një krim, ja ku u kryen krime, por nuk ishin krime lufte nga lart”.

“Shikoni se çfarë bëri ushtria serbe, policia serbe, njerëzit që ishin nën komandën e Millosheviqit dhe Vuçiqit. Unë jam shumë kritik ndaj asaj që po ndodh në Hagë tani”, ka thënë ai.