Ish-shefi i misionit të OSBE-së në Kosovë dhe njeriu që doli publikisht para 21 vitesh, duke dhënë alarmin për krimet serbë në Kosovë, Willaim Walker, ka bërë homazhe në Kompleksin Memorial në Reçak.

Walkeri ka thënë se është i kënaqur që njerëzit vijnë dhe nderojnë të rënët e Reçakut, pasi sipas tij, kjo simbolizon gjithë atë çfarë ka ndodhur në Kosovë gjatë luftës së fundit.

Ai ka thënë se populli i Kosovës duhet të kujtojë çdo masakër tjetër që ka ndodhur njëjtë sikurse këtë të Reçakut.

“Jam shumë i kënaqur se çdo vit më shumë njerëz nga Kosova vijnë të shohin se çfarë Reçaku është, atë që përfaqëson. Unë nuk jam i lumtur por i kënaqur që i kushtohet më shumë vëmendje asaj se çfarë ka ndodhur këtu sepse përfaqëson atë se çfarë ka ndodhur në të gjithë Kosovën. Jam i familjarizuar me masakrën e Reçakut, por kishte dhjetëra e qindra masakra të tjera dhe shpresoj që populli i Kosovës t’i kujtojë ato masakra ashtu siç e kujtojnë masakrën e Reçakut, ajo se çfarë ndodhi këtu dhe ajo se çfarë ndodhi me krimet e tjera të luftës nëpër Kosovë”, është shprehur ai.

Walkeri ka thënë se është i lumtur sa herë vjen në Reçak, për shkak të dashurisë dhe respektit që merr nga banorët.

Megjithatë, ai ka thënë se gjithnjë i kujtohet ajo ditë e para 21 vitesh dhe tmerri që kishte parë.

“Kur unë vijë këtu me të vërtet e kujtoj ditën kur isha më 1999 dhe që më sjell kujtime shumë të këqija, por duke parë fëmijët, familjet dhe fshatarët si më trajtojnë mua, si mund të mos jem shumë i kënaqur dhe i lumtur kur vij në Reçak?”, ka thënë Walkeri.

Më 15 janar 1999 Walker akuzoi forcat policore dhe ushtarake serbe se janë përgjegjës për masakrën e Reçakut duke kërkuar drejtësi.“Nuk jam jurist, por, sipas meje, këtu ka ndodhur një krim kundër njerizimit”, kishte qenë deklarata e famshme e Walker. /Ksp/