Administrata Trump është angazhuar në përpjekje për marrëveshje me disa vende të tjera për të marrë emigrantët e dëbuar nga ShBA-ja, sipas zyrtarëve të njohur me këtë çështje, ka raportuar “The Wall Street Journal”.

Zyrtarët e imigracionit po kërkojnë më shumë destinacione ku mund të dërgojnë emigrantë që ShBA-ja dëshiron t’i deportojë.

Në mesin e tyre, sipas këtij raportimi, është edhe Kosova.

Ndër vendet që ShBA-ja ka kërkuar të marrin të deportuarit janë Libia, Ruanda, Benini, Eswatini, Moldavia, Mongolia dhe Kosova.

ShBA-ja shpreson që këto vende të bien dakord me kërkesat e administratës, ndoshta në këmbim të marrëveshjeve financiare ose përfitimit politik për të ndihmuar Presidentin Trump të përmbushë një nga prioritetet e tij kryesore të brendshme.

Modeli i tyre i dëshiruar bazohet në një marrëveshje të njëhershme që administrata arriti me Panamanë në shkurt, sipas së cilës ata dërguan një aeroplan me mbi 100 emigrantë, kryesisht nga Lindja e Mesme, në vendin e Amerikës Qendrore. Panamaja më pas i ndaloi emigrantët dhe punoi për t’i dërguar në vendet e tyre të origjinës.