Xavi Hernandez është larguar nga Barcelona dhe ndeshja e së dielës ndaj Valencias ishte e fundit për të në krye të gjigantit katalunas. Pasi ra dakord të vazhdojë të drejtojë Barçën pas një vendimi të mëparshëm për t’u larguar, Barcelona vendosi të shkarkojë Xavin javën e kaluar. Por Xavi beson se kapitulli i tij me klubin mund të rihapet në të ardhmen dhe ai shpreson që një gjë e tillë të ndodhë që të rikthehet një ditë në “Camp Nou”.

“Do të ishte një nder të menaxhoja përsëri një ditë klubin e jetës sime. Tifozët duhet të kuptojnë se situata ekonomike është e vështirë. Po largohem me dashurinë e fansave dhe kjo më mbush me krenari”, ka thënë Xavi.

Thuhet se Xavi u kontaktua nga disa klube nëpër Evropë kur u konfirmua shkarkimi i tij. Megjithatë, mediat spanjolle raportojnë se ai planifikon të shkojë në një pushim njëvjeçar përpara se të kthehet në stërvitje.

Xavi e përfundon karrierën e tij si trajner i Barcelonës duke fituar dy trofe dhe duke e kualifikuar klubin për tre vite radhazi në Ligën e Kampionëve.