Kryetari i Kuvendit të Maqedonisë së Veriut, Talat Xhaferi, ka pritur sot në takim ministren e Punëve të Jashtme dhe Diasporës të Kosovës, Donika Gërvalla Shvarc.

Në profilin e tij në “Facebook”, ai ka shkruar se Republika e Kosovës e ka tërësisht mbështetjen e Maqedonisë për anëtarësim në të gjitha nismat dhe forumet multilaterale dhe rajonale.

“Sot në takimin me zëvendëskryeministren e dytë dhe ministren e Punëve të Jashtme dhe Diasporës së Republikës së Kosovës, znj. Donika Gërvalla Shvarc, shpreha kënaqësi për marrëdhëniet e shkëlqyera bilaterale që karakterizohen me mbështetje dhe respekt të ndërsjellë. Republika e Kosovës e ka tërësisht mbështetjen tonë në aderimin në të gjitha nismat dhe forumet multilaterale dhe rajonale, në organizatat dhe nismat ndërkombëtare”, ka shkruar Xhaferi.