Granit Xhaka beson se nuk duhej ta kishte bërë festimin me simbolin e shqiponjës në ndeshjen kundër Serbisë.

Zvicra kishte shënuar fitore 2:1 kundër Serbisë në Kupën e Botës së vitit 2018, falë golave të dy futbollistëve me prejardhje nga Kosova, Granit Xhaka dhe Xherdan Shaqiri.

Të dy futbollistët kishin festuar duke e bërë shqiponjën me duar, festim që kishte ngjallur reagime të shumta dhe vazhdon të komentohet edhe sot.

Xhaka ka dhënë së fundmi një intervistë për mediumin zviceran “Blick”, ku mes tjerash tha se nuk duhej ta kishte bërë atë festim, përcjell lajmi.net.

“Gjithçka shkoi mirë në ndeshjen ndaj Serbisë. Përveç shqiponjës. Nuk duhej ta kisha bërë këtë. E dini, unë kam pasur dy ndërprerje në karrierën time. Një në ndeshjen me Arsenalin në Crystal Palace kur u shava dhe në atë ndeshje kundër Serbisë kur bëra atë gjest”, ka thënë mesfushori.

“Blick” e ka arsyetuar  “shqiponjën e Xhakës” duke përmendur faktin se babai i tij, Ragipi, ishte një i arrestuar politik nga forcat serbe. Ai ishte i dënuar me tre vjet burg.

“Ajo që përjetoi babai im është diçka që nuk do t’ia dëshironi askujt. Deri më sot e di vetëm gjysmën e kësaj historie të tmerrshme. Kur isha njëzet vjeç, doja të dija çdo detaj. E pyeta derisa babai im iku sepse nuk duronte më. Tani e di që duhet të jem i kujdesshëm. Ishte një kohë e keqe për të”, ka thënë Xhaka.

Zvicra është në grup me Serbinë edhe në Kupën e Botës “Katar 2022”. Brazili dhe Kameruni janë dy kombëtaret tjera të Grupit G.

“Ky ishte kundërshtari i fundit që e kisha dëshiruar. Por, shpresoj që deri në momentin e ndeshjes të jemi më përpara falë dy fitoreve. Atëherë ne mund ta përballojmë lojën pa presion”, ka thënë Xhaka.