Mesfushori shqiptar, Granit Xhaka e ka cilësuar si një veprim pozitiv largimin e tij nga Arsenali te Bayer Leverkusen verën e kaluar. Xhaka u largua në verën e vitit 2023 nga Arsenali, pas tetë vitesh në “Emirates”, ku ishte njëri nga lojtarët kryesor.

Transferimi nga “Topçinjtë” te Leverkuseni u kritikua mjaft shumë, pasi klubi gjerman në sezonin e fundit para kalimit të Xhakës, luftoi për mbijetesë. Megjithatë, në sezonin e fundit, me transferimin e mesfushorit prishtinas dhe disa lojtarëve tjerë, Leverkuseni befasoi të gjithë duke fituar titullin në Bundesliga. Tani, gjatë përgatitjeve para-sezonale, Xhaka është pyetur edhe një herë për kalimin e tij nga Arsenali te Leverkuseni, veprim të cilin e ka cilësuar si “dy hapa para”.

“Për mua nuk ishte një hap prapa, por dy hapa përpara. Sepse pata pikërisht ndjenjën, në diskutimet me trajnerin dhe me Simon Rolfes, se diçka e veçantë mund të ndodhte këtu në vitet e ardhshme”, ka thënë Xhaka për “Bild”. Ndryshe, Xhaka pësoi një dëmtim të lehtë në Euro 2024 me Zvicrën, por tani është i rikuperuar plotësisht dhe i gatshëm për sezonin e ri me Leverkusenin.