Këshilli Prokurorial i Kosovës (KPK), i drejtuar nga kryesuesi Bahri Hyseni, ka mbajtur takimin e 191-të me radhë.

Takimi i sotëm ka filluar me shqyrtimin e Rregullores për angazhimin dhe përcaktimin e tarifave për kompensimin e përkthyesve dhe interpretëve që angazhohen në sistemin prokurorial, Rregullore e cila edhe u miratua nga anëtarët e Këshillit.

Në vazhdim është prezantuar dhe është diskutuar raporti i Komisionit për rishqyrtim të kundërshtimeve të paraqitura nga kandidatët për kryeprokurorë të prokurorive themelore të Gjakovës, Gjilanit, Prizrenit dhe Pejës.

Pas diskutimeve, Këshilli ka miratuar pjesërisht këtë raport, ku si rrjedhojë janë refuzuar kundërshtimet e paraqitura nga kandidatët.

Më pas, Këshilli ka zhvilluar procesin e votimit për zgjedhjen e Kryeprokurorit të Prokurorisë së Apelit dhe kryeprokurorëve të 6 prokurorive themelore.

Kryeprokuror i Prokurorisë së Apelit, me 11 vota për dhe asnjë kundër, është zgjedhur Xhevdet Bislimi.

Kryeprokuror i Prokurorisë Themelore të Pejës, me 11 vota për dhe asnjë kundër, është zgjedhur Agim Kurmehaj.

Kryeprokuror i Prokurorisë Themelore të Ferizajt, me 11 vota për dhe asnjë kundër, është zgjedhur Shukri Jashari.

Kryeprokuror i Prokurorisë Themelore të Mitrovicës, me 10 vota për dhe 1 kundër, është zgjedhur Ismet Ujkani.

Për jryeprokuror të Prokurorisë Themelore në Prizren gara është zhvilluar në mes të prokurorëve Admir Shala dhe Ervehe Gashi, ku pas procesit të votimit Admir Shala është zgjedhur kryeprokuror i kësaj prokurorie me 7 vota për. Ndërsa kundërkandidatja e tij ka marrë 4 vota.

Për kryeprokuror të Prokurorisë Themelore në Gjilan gara është zhvilluar në mes të prokurorëve, Arben Kadriu dhe Agron Uka, ku pas procesit të votimit Arben Kadriu është zgjedhur kryeprokuror i kësaj prokurorie me 6 vota për. Ndërsa kundërkandidati i tij mori 5 vota.

Ndërsa, për Prokurorinë Themelore të Gjakovës do të rishpallet konkursi, sepse kandidatja për kryeprokurore, Ardita Beqiraj-Hyseni nuk u votua për këtë pozitë.

Në fund të takimit, Këshilli ka miratuar Raportin e Komisionit për rivlerësimin e performancës së katër prokurorëve.