Sot ka filluar procesi i hartimit të pakos legjislative që ka të bëjë me reformën e  administratës publike, me ç’rast ministri i Administratës Publike, Mahir Yagcilar, ka thënë se ky do të jetë vit i reformave të thella në administratë.

“Në këtë aspekt, ky vit do të jetë viti i reformave të thella në administratën publike dhe me ndikim pozitiv në punën e administratës publike përballë kërkesave të qytetarëve dhe bizneseve”, ka deklaruar Yagcilar.

Ai ka thënë se Projektligji për zyrtarët publik, synon të përcaktojë rregullat sa i përket marrëdhënies së punës për zyrtarët publik bazuar në profesionalizëm.

“Për nga fushëveprimi ky ligj rregullon marrëdhënien e punës për zyrtarët publik, që janë: nëpunësit civil, nëpunësit e shërbimeve publike, nëpunësit e kabineteve, nëpunësit teknik dhe administrativ”, ka theksuar ai.

Yagcilar ka thënë se Ligji për Pagat do të rregullojë pagat dhe përbërësit e pagave për të gjithë përfituesit që marrin paga nga buxheti i shtetit.