Golden Eagle Ylli ka mundur Vëllaznimin 87:74 (20:17, 20:14, 21:14, 9:25, 17:4), në kuadër të javës së pestë të Prince Caffe Superligës.

Loja ishte interesante, por vendësit e fillojnë më mirë, duke pasur epërsi 15:6, por mysafirët kundërpërgjigjen në fund të çerekut të pare, duke ngushtuar shifrat në 20:17.

Skuadra kuqezi vazhdon me lojë të mirë edhe në periudhën e dytë, duke kaluar në epërsi 22:23, megjithatë, vendasit me një seri prej 5:0, sërish kalojnë në epërsi 27:23. Më pas zhvillohet lojë interesante, derisa skuadrat shkuan në pushim me rezultat 40:31. Ylli e nisi furishëm pjesën e dytë, përkatësisht periodën e tretë, duke pasur epërsi deri në 22 pikë (54:32), kurse rezultati në semafor pas 30 minutash tregonte shifrat 61:45. Në 10 minutat e fundit, Vëllaznimi nuk u dorëzua dhe afron shifrat në 66:64, duke e bërë ndeshjen edhe më interesante.

Dramë u zhvillua deri në fund, kur Hortman i Vëllaznimit gjuan saktë nga 8 metra për tri pikë dhe barazon rezultatin në 70:70, 25 sekonda nga fundi. Ylli nuk shfrytëzoi aksionin e fundit dhe skuadrat shkuan në vazhdime. E, në vazhdime Ylli nuk lëshoi pe dhe fitoi në fund me rezultat 87:74. Te Golden Eagle Ylli u dallua Valon Bunjaku me 19 pikë, 12 kërcime dhe 11 asistime, kurse te Vëllaznimi më i miri ishte Christopher Hortman me 30 pikë, 19 kërcime e 7 asistime. Golden Eagle Ylli ka tri fitore dhe një humbje, kurse Vëllaznimi një fitore dhe katër humbje. Ndërsa Rahoveci e ka mundur Bashkimin në Prizren me rezultat 87:89 (13:23, 22:26, 25:23, 27:17), në kuadër të javës së pestë të Prince Caffe Superligës. Nikola Vukçeviq ishte më i dalluari te Bashkimi me 32 pikë, kurse te Rahoveci u dalluan treshja Isaiah Traylor me 28 pikë, 10 kërcime e 8 asistime, Alban Veseli me 27 pikë e 7 kërcime dhe Marvin Jones me 19 pikë. Bashkimi ka një fitore dhe tri humbje, kurse Rahoveci tri fitore dhe dy humbje.