Një ekip arkeologësh të udhëhequr nga egjiptologu Zahi Hawass ka zbuluar piramidën e një mbretëreshe të lashtë egjiptiane të panjohur deri tani në pllajën e Gizës, në Saqqara. Është një kuti e re mrekullish nëntokësore, e lidhur me një seri tunelesh, të mbushura me sarkofagë, mumie dhe objekte.

Vitet e fundit, arkeologët kanë vazhduar të gërmojnë Saqqara, një pllajë me rërë e përdorur për të ndërtuar monumente funerale madhështore, që tani konsiderohet si një nga vendet kryesore arkeologjike të Gizës, një fushë e shkretë që ndodhet 32 ​​kilometra në jug të Kajros. Kohët e fundit, këtu ishte zbuluar një tjetër zonë nëntokësore plot me arkivole dhe mumie, e cila mund t’i përkiste këshilltarëve më të afërt të Tutankhamun, fëmijës faraon, i bërë i pavdekshëm nga zbulimi i varrit të tij të paprekur, në vitin 1922, në Luginën e Mbretërve në Tebën e lashtë (Luksori modern).

Arkeologët kanë vendosur të përqendrojnë gërmimet e tyre rreth një piramide tjetër, e cila ngrihet në këtë zonë dhe i përkiste Tetit (2350-2330 p.e.s.), faraonit të parë të dinastisë VI egjiptiane, periudhë në të cilën qytetërimi egjiptian filloi një fazë rënie.

“Thetis ishte një faraon që adhurohej si zot në periudhën e Mbretërisë së Re, kështu që të gjithë donin të varroseshin pranë tij, gjë që na bindi të ngushtonim kërkimet tona rreth kësaj zone,” tha egjiptologu Zahi Hawass, i cili ka qenë edhe Ministër i Antikiteteve, i famshëm për fushatën e tij për të kthyer në Egjipt pasuritë arkeologjike të ruajtura në muzetë kryesorë të botës, veçanërisht në Muzeun Britanik në Londër, ku Guri i Rozetës ruhet që nga viti 1802.

Shumica e varreve të zbuluara në Saqqara në të kaluarën i përkisnin epokës së Mbretërisë së Vjetër (2700-2192 p.e.s) ose periudhës së vonë (664-304 p. e. s). Por tani janë gjetur 22 puse të lidhura me njëri-tjetrin me anë të tuneleve nëntokësore, 9 dhe 18 metra të thellë, në të cilët janë varrosur sarkofagët që i atribuohen Mbretërisë së Re (1543 deri në 1078 para erës sonë), epoka e artë e Egjiptit të lashtë. Duke vazhduar gërmimet në këtë zonë, arkeologët gjetën gjithashtu një sarkofag të madh së bashku me 300 varrime nga periudha e Mbretërisë së Re.

“Gjetja e varreve të Mbretërisë së Re në këtë zonë është një risi absolute, por ajo që është edhe më e habitshme është se çdo sarkofag shoqërohet nga një portret funerali me një fytyrë të ndryshme për çdo arkivol, duke bërë të mundur dallimin edhe të pranisë së burrave nga ajo e femrave. Dekorimet brenda varrit, nga ana tjetër, janë skena të frymëzuara nga Libri i të Vdekurve (një koleksion prej rreth 200 formulash për arritjen e jetës së përjetshme, të shoqëruara me ilustrime me ngjyra). Dhe, një element tjetër domethënës është që çdo varr përmban edhe emrin e të ndjerit,” thekson Hawass në një deklaratë të publikuar për Live Science.

Brenda arkivoleve, studiuesit gjetën mumie në gjendje të shkëlqyer, edhe pas shekujsh, jo vetëm falë klimës së thatë të shkretëtirës.

“Ky zbulim i jashtëzakonshëm tregon se teknika e mumifikimit arriti kulmin e saj në Mbretërinë e Re”, thekson Hawass. “Disa varre madje mbroheshin nga një mbulesë e dyfishtë dhe kur zbulon sarkofagun shfaqet një mumie me kokën e mbuluar nga një maskë e fortë ari vezulluese”.

“Brenda këtyre dhomave nëntokësore janë gjetur objekte të shumta, si një lojë e lashtë egjiptiane, e quajtur Senet (një kryqëzim midis damëve dhe tavëllit, në të cilin lëvizjet e pengut në tabelë korrespondonin, sipas bestytnisë së kohës, në rrugën e të ndjerit në jetën e përtejme), si dhe statuja të vogla funerale kushtuar hyjnive të vogla dhe një statujë për nder të Ptah-Seker-Osiris, zotit të nëntokës, gjykimit të të cilit të vdekurit iu nënshtruan për të vazhduar jetën në jetën e përtejme dhe më në fund armë, të tilla si një sëpatë beteje”, shtoi egjiptologu.

Sarkofagët, artefaktet, armët dhe xhevahiret e gjetura në këtë vend të ri arkeologjik do të ekspozohen në Muzeun e ri të Madh Egjiptian të Gizës, inaugurimi i të cilit është planifikuar për në vitin 2023.

Por zbulimi më i rëndësishëm historik është zbulimi i një piramide të ndërtuar për nder të një sundimtareje të re, të panjohur deri më tani në panteonin e faraonëve egjiptianë. Bëhet fjalë për Mbretëreshën Neith, e cila nuk është përmendur kurrë në asnjë të dhënë historike. Kjo na lejon të rishkruajmë, edhe një herë, historinë e Egjiptit të lashtë në një mënyrë më të saktë ”, përfundon Hawass.