Presidenti i Dallas Mavericks, Mark Cuban, në një intervistë për “Dallas Morning News”, ka sqaruar se përse ende sot nuk ka një datë të saktë për rinisjen e NBA-së. Kampionati është ndalur që në mesin e marsit për shkak të koronavirus.

“E vetmja arsye se përse të gjithë po presim është se jo të gjitha ekipet dhe shtetet ku ato i përkasin kanë mundësi të bëjnë rregullisht teste ndaj koronavirus”, ka thënë Cuban.

Siç duhet, për të mbyllur sezonin 2019-2020 në NBA duhen rreth 15 mijë teste ndaj Covid-19, raporton “Telesport”.

“Në disa shtete është e lehtë që ekipet dhe stafi të bëjnë teste deri në fund të sezonit. Ndërsa në disa shtete është e vështirë që kjo gjë të realizohet deri në fund të sezonit”, u shpreh Cuban.

Më tej, presidenti i Dallas tha: “Ne nuk dëshirojmë që t’u heqim mundësinë për të bërë teste ndaj koronavirus qytetarëve amerikanë për të përfunduar një kampionat basketbolli pa tifozë. Të gjithë janë të barabartë”.