Presidenti ukrainas, Volodymyr Zelensky, në arritje në samitin urgjent të vendeve të BE-së që sot po nis në Bruksel, ka falënderuar liderët evropianë për “mbështetjen e tyre të fortë” të cilën ai thotë se e ka parë “që nga fillimi i luftës dhe … gjatë gjithë kësaj periudhe dhe javën e kaluar, ju qëndroni me ne”.

“Ne jemi shumë mirënjohës që nuk jemi vetëm. Dhe këto nuk janë vetëm fjalë. Ne e ndjejmë atë. Është shumë e rëndësishme që ju [dërgoni] një sinjal të fortë për popullin ukrainas, për luftëtarët ukrainas, për civilët, për të gjitha familjet tona. Dhe është e mrekullueshme që nuk jemi vetëm”, ka thënë ai.

Zelensky në një prononcimin për medie ishte bashkë me presidenten e Komisionit Evropian, Ursula von der Leyen, si dhe presidentin e Këshillit Evropian, Antonio Costa.

Costa ka thënë se liderët evropianë duhet të “marrin vendime dhe të përmbushin” premtimet e tyre ndërsa përballen me seriozitetin e situatës.

“Ne jemi këtu për të mbështetur Ukrainën për të arritur një paqe gjithëpërfshirëse, të drejtë dhe të qëndrueshme”, ka thënë ai.

Duke iu kthyer Zelensky-t, ai i ka thënë atij “ne jemi me ju, ne do të vazhdojmë me ju tani dhe në të ardhmen”, pasi ai thotë se e sheh Ukrainën si një “shtet anëtar të ardhshëm”.

Von der Leyen ka thënë se është “një moment vendimtar” për Evropën dhe Ukrainën pasi kontinenti “përballet me një rrezik të qartë”.