Deputeti i LDK-së, Armend Zemaj i ka uruar mirëseardhje kryeministrit të Kosovës, Albin Kurti, pas gati dy javësh në Greqi, Francë e Bruksel.

Ai në seancën e sotme të Kuvendit ia numëroi Kurtit ngjarjet që kanë ndodhur gjatë mungesës së tij në Kosovë.

“Kryeministër është e udhës të thuhet mirë se ke ardhur. Një kryeministër i cili po mungon për një kohë të gjatë ndoshta duhet ta kishte arsyen e vet, por është e paarsyeshme mungesa e qeverisë në Kuvendin e Kosovës. Nëse keni shkuar jashtë vendit për dy javë, mendoj se qeveria ish dashtë me qenë prezent. Asnjë marrëveshje ndërkombëtare nuk ka kaluar në Kuvendin e Kosovës, e këto marrëveshje janë jetike për vendin. Gjatë kohës sa nuk ishe këtu ndodhi ngjarja në komunën e Deçanit. Munguat ju dhe dikasteri i Ministrisë së Shëndetësisë. Ndodhën edhe vërshimet dhe nuk pati asnjë qasje në ketë drejtim nga ana e qeverisë. Është organizuar një protestë nga ish kolegët e juaj dhe ka përfunduar me dhunë. Ministria e Infrastrukturës po tenton me vjedh paranë publike në një ofertë e cila kushton 00.06 cent, këta po tentojnë me ua shit qytetarëve 5 euro. Kjo është shumë e vogël por e dëmton xhepin e qytetarëve. Nuk arsyetohen këto fakte dhe kjo neglizhencë thuajse nuk ka qeveri. Duhet të jeni të përgjegjshëm”, ka thënë deputeti Zemaj.