Prokurori Ersan Qavolli, zëvendëskryeprokuror në Prokurorinë Themelore në Pejë, në raportimin e tij para anëtarëve të Këshillit Prokurorial të Kosovës (KPK), të enjten ka deklaruar se prokuroria ka ngritur 20 aktakuza për rastin e ndërtimeve pa leje në një fshat në Bjeshkët e Rugovës.

Një deklarim të tillë, prokurori Qavolli e ka bërë të enjten në takimin e 233-të të KPK-së, ku kryeprokurorët e prokurorive të Republikës së Kosovës, kanë raportuar para anëtarëve të këshillit për periudhën prill-qershor 2023, raporton “Betimi për Drejtësi”.

Para anëtarëve të Këshillit, Qavolli, ka thënë se janë ngritur 20 aktakuza për veprën penale të ndërtimeve pa leje, lidhur me rastin që ishte potencuar nga ministri Peci.

“Vetëm për vendin ku është potencuar nga ministri ne kemi ngritur për të gjitha rastet 20 aktakuza për veprën penale të ndërtimeve pa leje, prandaj edhe pretendimet që kanë qenë të shfaqura në media nuk qëndrojnë”, ka thënë prokurori Qavolli.

Një deklarim i tillë nga prokurori Qavolli, ka ardhur pasi ministri i Bujqësisë, Pylltarisë dhe Zhvillimit Rural, Faton Peci kishte reaguar për ndërtimet pa leje në fshatin Stankaj të Komunës së Pejës, me arsyetimin se Prokuroria nuk kishte ndërmarrë asnjë veprim lidhur me denoncimin e ministrisë për ndërtimin e 25 vilave në këtë fshat.

Ndërsa  sa i përket veprës penale “Ndërtime pa leje”, prokurori Qavolli ka thënë se janë ngritur 429 aktakuza dhe se Prokuroria Themelore në Pejë nuk ka qëndruar duarkryq.

“E keni pa kohën e fundit që kanë qenë disa reagime për ndërtimet pa leje në një fshat të Bjeshkëve të Rugovës, ne si Prokurori nuk kemi qëndruar duarkryq në raport me ato raste, lidhur me ndërtimet pa leje ne kemi ngritur gjatë periudhës 429 aktakuza”, ka thënë Qavolli para anëtarëve të KPK-së.

Qavolli ka dhënë statistika edhe lidhur me rastet e dhunës në familje, duke thënë se gjatë periudhës raportuese janë pranuar 77 lëndë të kësaj natyre.

Sipas tij, nga 77 lëndë të pranuara të dhunës në familje, Prokuroria në Pejë ka ngritur 66 aktakuza, janë hedhur tri kallëzime penale dhe në një rast ai tha se janë pushuar hetimet.

Kurse, në 13 kërkesa për caktim të paraburgimit, sipas tij janë aprovuar të gjitha.