![](https://www.epokaere.com/wp-content/uploads/2023/08/mjeku-1.jpg)
Zëvendësministri Mjeku takon ministren e Transformimit Digjital të Sllovenisë, flasin për sektorin TIK-ut
Zëvendësministri i Ekonomisë së Kosovës, Getoar Mjeku ka zhvilluar takim dypalësh ministren e Transformimit Digjital të Republikës së Sllovenisë, Emilija Stojmenova, në kuadër të konferencës “Forumi Strategjik i Bledit 2023”.
Në takim, zëvendësministri Mjeku është shoqëruar edhe nga këshilltari i kryeministrit Kurti për sektorin e TIK-ut, Lulëzon Jagxhiu.
Gjatë takimit ministrja Stojmenova e ka përgëzuar zëvendësministrin Mjeku për arritjen e Republikës së Kosovës në mbulueshmëri të 100% të zonave me internet të shpejtë, duke e cilësuar këtë arritje si shumë mbresëlënëse.
Ajo e njoftoi zëvendësministrin Mjeku që Sllovenia është aktualisht duke punuar në të njëjtin drejtim dhe synojnë që ta arrijnë këtë deri në vitin 2030.
Për më shumë ajo ka përgëzuar Republikën e Kosovës për përqindjen e madhe të vajzave në sektorin e TIK-ut, që në nivel universitar është mbi 50%.
Tutje është diskutuar për bashkëpunimin e shkëlqyeshëm mes dy vendeve, në përgjithësi, mirëpo edhe në sektorin e TIK-ut në veçanti, ku Sllovenia është partnere e Kosovës.
Palët kanë folur rreth zhvillimit e aftësimit të fuqisë punëtore, zhvillimit të Parkut të Inovacionit dhe Teknologjisë, si dhe hovit të zhvillimit të sektorit privat të TIK-ut në të dy vendet.
Po ashtu, është diskutuar për përpjekjet e të dy vendeve për të centralizuar digjitalizimin e shërbimeve publike si dhe lehtësimin e qasjes në to për të gjithë qytetarët, aspekt horizontal në të gjitha sektorët.