Zëvendësministri i Drejtësisë, Vigan Qorrolli, së bashku me këshilltaren për Sigurinë e Njeriut nga Ambasada e Zvicrës në Kosovë, Sarah Jaquiery, kryetaren e Gjykatës Themelore në Prishtinë, Albina Shabani-Rama, Prokurorin Special në Prokurorinë Speciale të Kosovës, Ilir Morina, mori pjesë në tryezën e diskutimit mbi lansimin e Raportit për Monitorim të Gjykimeve për Krimet e Luftës në Kosovë, me titull: “Thyerja e Heshtjes: Drejtësia për Viktimat e Luftës?”, organizuar nga Fondi për të Drejtën Humanitare Kosovë (FDHK).

Gjatë fjalës së tij hyrëse, zëvendësministri Qorrolli theksoi rëndësinë e angazhimit të institucioneve të Kosovës në sigurimin e drejtësisë dhe barazisë për viktimat e krimeve të luftës.

Ai gjithashtu foli për përpjekjet e vazhdueshme të Qeverisë së Kosovës për të garantuar procese gjyqësore të drejta dhe ofrimin e mbështetjes së duhur për viktimat.

Raporti i FDHK-së, shpalos rekomandime kyçe, duke përfshirë mundësimin e gjykimeve në mungesë si një hap të rëndësishëm për vënien e drejtësisë. Nga 35 raste të monitoruara, 15 janë zhvilluar në mungesë të të pandehurve. “Kriminelët e luftës duhet të gjenden dhe të vuajnë dënimin e merituar, por gjykimi në mungesë është një mekanizë jetik për drejtësinë”, theksoi Qorrolli.

Tutje zëvendësministri Qorrolli rikujtoi se krimet e luftës dhe krimet kundër njerëzimit të kryera nga shteti i Serbisë gjatë luftës në Kosovë kanë lënë pasoja të thella, jo vetëm për viktimat e drejtpërdrejta, por edhe për tërë shoqërinë.

Në këtë drejtim, sipas Qorrollit, Qeveria e Kosovës ka prioritizuar krijimin e Strategjisë Kombëtare për Drejtësinë Tranzicionale, e cila trajton shkeljet e rënda të të drejtave të njeriut dhe krimet e luftës, bazuar në parime të qarta si: qasja e përqendruar te viktima, ndjeshmëria gjinore, pajtueshmëria me standardet ndërkombëtare dhe barazia.

Përveç qasjes në drejtësi, zëvendësministri Qorrolli tha se Strategjia thekson nevojën për forcimin e sistemit të drejtësisë dhe ngritjen e kapaciteteve institucionale, si dhe rritjen e bashkëpunimit rajonal e ndërkombëtar. Për të përforcuar kapacitetet e institucioneve të drejtësisë, Ministria e Drejtësisë ka ndarë buxhet për shtimin e tre prokurorëve, pesë bashkëpunëtorëve profesionalë dhe dy përkthyesve që do të fokusohen ekskluzivisht në krimet e luftës. “Drejtësia nuk është vetëm ndëshkim i kriminelëve, por një mundësi për pajtim dhe ndërtim të një të ardhmeje të drejtë dhe të barabartë për brezat që vijnë”, deklaroi zëvendësministri Qorrolli.

Në këtë drejtim, sipas Qorrollit, Qeveria e Kosovës ka prioritizuar krijimin e Strategjisë Kombëtare për Drejtësinë Tranzicionale, e cila trajton shkeljet e rënda të të drejtave të njeriut dhe krimet e luftës, bazuar në parime të qarta si: qasja e përqendruar te viktima, ndjeshmëria gjinore, pajtueshmëria me standardet ndërkombëtare dhe barazia.