Rreth 60.7 milionë persona në Turqi do të mund të votojnë në zgjedhjet e ardhshme parlamentare dhe presidenciale, që mbahen në maj të këtij viti.

Sipas autoriteteve, edhe 3.4 milionë shtetas turq që jetojnë jashtë shtetit, do të mund të votojnë në këto zgjedhje.

Zgjedhjet do të mbahen më 14 maj, derisa turqit që jetojnë jashtë shtetit do të mund të votojnë deri më 27 prill.

Të rinjtë besohet se do të luajnë rol të rëndësishëm në këto zgjedhje. Rreth 5 milionë do të rinj do të mund të votojnë për herë të parë.

Pak para zgjedhjeve, presidenti turk, Recep Tayyip Erdogan, e ka prezantuar planin për rritje të shpenzimeve publike, i cili shihet si përpjekje për të rritur bazën e votuesve, pak para zgjedhjeve.

Në planin e Erdoganit përfshihen ulja e taksave, rritja e pagave, subvencione për energjinë dhe më shumë punë qeveritare.

Erdogan është zotuar edhe për ulje të normës së inflacionit dhe rritje ekonomike. Këto premtime janë bërë në kohën e rritjes rekorde të çmimeve të jetesës dhe vështirësive ekonomike, të cilat Turqia nuk i ka përjetuar në dy dekada.

Sondazhet sugjerojnë garë të ngushtë në mes të Erdoganit dhe liderit opozitar, Kemal Kılıçdaroglu.

Disa analistë besojnë se Kılıçdaroglu, 74-vjeçar, kryetar i partisë sekulare, Partia Popullore Republikane, ka më shumë mundësi për fitore sesa Erdogan, 69-vjeçar.

Kılıçdaroglu mund të gëzojë mbështetjen e bllokut opozitar – një kombinim i rrallë mes islamistëve, kurdëve dhe nacionalistëve. Fushata këtë herë ka nisur nën hijen e tërmetit shkatërrues që ka goditur juglindjen e shtetit më 6 shkurt. Erdogan është kritikuar për menaxhim të dobët të krizës, pas tërmetit.