Kryeministri i Shqipërisë, Edi Rama, ka bërë me dije pas mbledhjes së Qeverisë këtë të premte se është vendosur se në harkun e një viti paga mesatare do shkojë nga 563 euro në 900 euro.

“Dola sot këtu sepse është një nga ditët të shënuara të qeverisjes. Sapo kemi dakordësuar projektligjin për reformën e re të pagave. Kemi sanksionuar e zeza mbi të bardh se në harkun e një viti paga mesatare do shkojë nga 563 euro në 900 euro. Të mund të rishpërndajmë të ardhurat aty ku edhe me shumë të drejtë familjet zakonshme shqiptar e presin më shumë se çdo gjë tjetër në arkën e buxheteve të tyre. Është e rëndësishme për ne që të konstatojmë se sa e qëndrueshme është ekonomia jonë.  Ja kemi dalë të rezistojmë plagëve dhe problemeve të rënda”, ka thënë Rama.

Duke thënë se synon të bëjë më të mirën dhe maksimumin për shqiptarët, Rama ka prezantuar rritjen e pagave në disa sektorë, duke theksuar dhe hapat që do të ndiqen.

“Nuk dua të humbas vëmendjen në shifra, jam këtu me ministren e Financave dhe dua ta falënderoj për punën. Kemi pasur diskutime dhe kemi konsultuar shifra, por në fund kemi rënë dakord që t’u japim shqiptarëve maksimumin. Nuk ka kënaqësi më të madhe sesa t’u them specialistëve më të ulët se paga e tyre do të shkojë 81 mijë lekë. Apo t’u them mësuesve në arsimin e mesëm që do të shkojë mbi 100 mijë lekë apo në arsimin e ulët që do të shkojë deri në 90 mijë. Këto janë shifra bazë dhe më pas vitet e eksperiencës dhe kualifikimet do të kenë ndikimet e tyre. Një rritje do të ketë për pedagogët me 20 për qind, me një diskrecion që mund të shkojë deri në 30 për qind. Kënaqësi t’u them infermierëve që do të marrin 87 mijë lekë si bazë. Janë rritur pagat për FA dhe do të vijojmë t’i rrisim. Janë rritur pagat për zjarrfikësit, të cilat do t’i çojmë deri në 80 mijë lekë. Kjo do të bëhet në dy hapa. Një hap do të bëhet tani me mësuesit, mjekët dhe infermierët dhe hapi tjetër do të jetë vitin e ardhshëm, kur do të bëjmë plotësimin e reformave të pagave dhe do arrijmë në 900 euro pagë mesatare”, ka thënë Rama./A2