Në AKPM me vendim të zv.drejtorit është shpërbërë Komisioni Disiplinor, ndonëse një zyrtare ishte në procedurë disiplinore.

Arian Ahmeti vetëm dy ditë pasi ka marr detyrën e zëvendësuesit të drejtorit të Agjencisë për Produkte dhe Pajisje Medicinale, ka marr një vendim për shpërbërjen e Komisionit Disiplinor në këtë institucion, shkruan Gazeta Shneta.

Gazeta posedon vendimin e Ahmetit i cili mban datën 19 gusht 2024 me të cilin janë shfuqizuar dy vendime të datës 11.10.2023 dhe 07.08.2024.

Por derisa është marr ky vendim për shfuqizimin e Komisionit Disiplinor, një zyrtare e AKPM-së ka qenë në një procedurë disiplinore.

Ndaj kësaj zyrtare ishte iniciuar procedurë disiplinore për disa shkelje të pretenduara. Keqpërdorim i kartelës së vijueshmërisë, konflikt interesi meqë zyrtarja kishte hapur një biznes me veprimtari të ngjashme me detyrat që i ka në AKPM, si dhe për tejkalim të autorizimeve dhe kompetencave.

Gazeta ka kërkuar sqarime nga AKPM dhe zv.drejtori Ahmeti për këtë çështje, por deri më tani nuk kanë kthyer përgjigje.