Zvicra ka ndarë 86 milionë euro për Kosovën me qëllim të mbështetjes së projekteve të ekonomisë dhe zhvillimit të demokracisë dhe kapaciteteve ujore.

Lajmin e ka bërë me dije ambasadori i Zvicrës, Thomas Kolly dhe zëvendësdrejtoresha e Agjencisë Zvicerane për Zhvillim dhe Bashkëpunim (SDC), Ruth Huber, gjatë prezantimit të programit për vitin 2022-2025 në Kosovë.

“Kosova është bërë partner i Zvicrës dhe mendojmë që të vazhdojmë këtë miqësi, miqësi që kemi jo vetëm në aspektin e futbollit, por edhe në sfera të tjera”, ka thënë ambasadori Kolly.

Ndërsa zëvendësdrejtoresha e SDC-së, Ruth Huber, ka thënë se ky program është shumë i rëndësishëm për Kosovën.

“Historia na ka bashkuar. Po i referohem këtu diasporës, ata që janë në Zvicër, të cilët i kemi pranuar gjatë vitit ’99-të. Programi të cilin sot e kemi lansuar është shumë i rëndësishëm dhe do të jetë një progres për Kosovën në tri fusha: ujë, ekonomi dhe demokraci. Vetëm në vitet e fundit rreth 600 mijë qytetarë kanë përfituar qasje në ujë, dhe 10 mijë persona janë të punësuar. Prioriteti ynë mbetet luftimi i korrupsionit, zhvillimi ekonomik dhe në zgjidhjen e një marrëveshje midis Kosovës dhe Serbisë. Agresioni rus në Ukrainë na ka treguar sa e rëndësishme është demokracia”, ka thënë Huber.