Pas njohjes së Republikës së Kosovës nga Kenia, këshilltari i ish-presidentit Behgjet Pacolli, Jetlir Zyberaj ka paralajmëruar edhe njohje tjera.

Në një intervistë për Paradoks, Zyberaj ka bërë të ditur se Behgjet Pacolli nuk e ka ndalur lobimin për të arritur njohje të reja për Kosovën.

Zyberaj ka bërë të ditur se deri më tani Pacolli i ka sjellë rreth 43 njohje Kosovës, teksa është afër që të arrijë njohjet edhe nga 7 shtete tjera.

“Behgjet Pacolli ka qenë meritor për 43 njohje të Kosovës në mënyrë direkte dhe indirekte. Kemi edhe shtatë shtete prej të cilave presim njohje, tri prej tyre që mund të ndodhin muajt në vazhdim. Njëri prej këtyre shteteve është shumë i fuqishëm”, ka deklaruar Zyberaj në Paradoks.

Ai ka treguar se njohja nga Kenia ia ka lehtësuar punën Pacolli duke pasur parasysh statutin e Kenias si një shtet i fuqishëm.

Kenia u bë shteti i 118-të që njohu pavarësinë e Kosovës. Më meritori për këtë njohje u cilësua ish-presidenti Behgjet Pacolli.