Gjatë dëshmisë së tij në Hagë, dëshmitari Bislim Zyrapi, ka thënë të martën se çështja e të burgosurve nuk ishte kompetencë e drejtorisë operative të Shtabit të Përgjithshëm të UÇK-së.

Por, sipas tij, autoriteti i tij i takonte komandantëve të njësive apo zonave që vepronin në një territor të caktuar e që më pas merrej edhe sektori juridik, raporton “Betimi për Drejtësi”.

“Roli dhe kompetenca e drejtorisë operative e cekem edhe më herët nuk ishte të merret me këto çështje. Ajo ishte që të merret me operacione. Numër një është operacionazimi i njësive, përgatitja e njësive, pastaj të organizojë mbrojtje ose sulmet të aspektit të gjerë të cilët janë aspekte të operacioneve operative dhe strategjike, pra në atë se çfarë ndodhë brenda për brenda saj. Zënë robër e ajo të gjitha është në kuadër të komandantit të njësisë që vepron në atë territor dhe që e ka marrë atë operacion. Nuk është e drejtorisë operative që të merret me atë çështje dhe me burgosjen e zënë robër. Është sektori juridik që merret me atë çështje dhe komanda adekuate e cila është duke vepruar në atë territor”, ka thënë dëshmitari Zyrapi.

Përpara kësaj është diskutua për një operacion në Bardh të Madh (ish-Ballaqefci) në të cilën pjesëtarët e UÇK-së-së kishin marrë kontrollin e minierës sipërfaqësore të thëngjillit për çfarë edhe pretendohet se kishin burgosur disa minatorë serbë.

“Nga sa me kujtohet nuk kam marrë asnjë info nga zëvendëskomandanti. Unë në atë kohë e kam pas për detyrë të merresha vetëm me aspekte ushtarake”, ka thënë dëshmitari në përgjigje të pyetjeve të avokatit Roberts.

Ai ka rikonfirmuar se është e drejtë të thuhet se autoritetin për të burgosurit në luftë e kishte komandanti i zonës.

Në fillim kur Zyrapi kishte hyrë në Kosovë në 98-ën, ka thënë se kishte shumë shtabe lokale të cilat ishin në nivel shtabi e që udhëheqësit e tyre i bindeshin personat që t’i kapnin armët.

“Po në atë kohë”,  është përgjigjur dëshmitari kur u pyet se a është e drejtë të thuhet që në atë kohë ata nuk e ndjenin për detyrim t’i përgjigjeshin ndokujt.

Zyrapi ka pohuar se këta persona kishin njohuri e përvojë të kufizuar sa i takon luftës.

Gjithashtu, ai ka konfirmuar se kishte komunikuar me disa nga shtabet lokale gjatë kësaj kohe sa ishte në Kosovë.

Ndonëse kishte dhënë udhëzime dhe këshilla, dëshmitari  Zyrapi ka thënë se ata nuk e kishin për detyrim që të zbatonin atë se çfarë kishte thënë ai.

Vlen të theksohet se në pyetjet e Roberts, dëshmitari është përgjigjur se ka qenë pjesëtarë i armatës jugosllave, boshnjake e po ashtu edhe në atë të Kosovës.

Ndryshe, Roberts e ka njoftuar dëshmitarin se kundërpyetjet e tij do të vazhdojnë edhe gjatë ditës së nesërme (e mërkurë).