Kryesia e Lidhjes Demokratike të Kosovës, sot ka mbajtur mbledhjen e radhës, në kuadër të përgatitjes së Kuvendit të LDK-së, përkatësisht Kuvendit për zgjedhjen e kryetarit të LDK-së.

“Në mbledhje u dakordua për përgatitjet e nevojshme dhe të domosdoshme për mbledhjen e Kuvendit dhe në parim u konfirmuan edhe emrat e delegatëve të Kuvendit, të cilët janë konfirmuar nga secila degë e LDK-së”, ka njoftuar LDK-ja.

Në mbledhjen e sotme, u paraqitën edhe dy kandidatura për kryetar të LDK-së.

“Kandidaturat për kryetar të LDK-së i paraqitën z. Lutfi Haziri nënkryetar i LDK-së dhe kryetar i Gjilanit si dhe z. Lumir Abdixhiku, anëtar i Kryesisë së LDK-së”, është theksuar në njoftimin e LDK-së.

Në këtë mbledhje u bë me dije se ka edhe kandidatura tjera, që mund paraqiten ditëve në vijim.