Ish-mesfushori i Manchester Unitedit dhe Borussia Dortmundit, japonezi Shinji Kagawa karrierën do ta vazhdojë në Greqi.

Ai të mërkurën është prezantuar te skuadra e PAOK-ut, me të cilin ka firmosur kontratë deri në verën e vitit 2022.

Kagawa te PAOK-u është transferuar si futbollist i lirë pasi prej vitit të shkuar ishte pa klub.

31-vjeçari sezonin e shkuar ishte pjesë e Real Zaragozas që garonte në kategorinë e dytë të Spanjës për të cilin shënoi katër gola dhe asistoi dy herë në 36 ndeshje.

Kagawa prej vitit 2010 luan në futbollin evropian kur u largua nga Cerezo Osaka kurse ka luajtur edhe për Beshiktashin. Ai ka edhe 97 ndeshje e 31 gola të shënuar për Japoninë.