Në kuadër të bashkëpunimit të Drejtorisë Rajonale të Policisë në Ferizaj me pjesëtarët e KFOR-it amerikan të kampit ushtarak “Bondsteel” të enjten në Drejtorinë Rajonale të Policisë Ferizaj është mbajtur një ligjëratë me temën: “Reagimi për dhunën në familje” nga Jake- Joseph Allard, ndihmësoficer për dhunë në familje nga departamenti i policisë së Andover, në Masaçusets të ShBA-së.

Drejtoria Rajonale e Policisë në Ferizaj ka thënë se bazë e kësaj ligjërate,  ishin leksionet, metodat dhe përvojat që janë përdorur në rastet e dhunës në familje nga departamenti i policisë së Andover, në Masaçusets, të cilat sipas tyre, në përgjithësi kishin dhënë rezultate të mira.

Gjithashtu gjatë kësaj ligjërate janë shkëmbyer edhe përvojat për krijimin e marrëdhënieve të mira me agjencionet e shërbimeve sociale, metodat e shërbimit të viktimave të dhunës në familje dhe teknikat e të shkruarit të raportit.

Në këtë ligjëratë kanë marrë pjesë edhe shefi i hetimeve të përgjithshme nga sektori rajonal i hetimeve, shefi i sektorit rajonal për operativë, koordinatori rajonal i dhunës në familje dhe të gjithë hetuesit primarë të rasteve të dhunës në familje, të stacioneve policore : Ferizaj, Kaçanik, Shtime , Shtërpcë dhe Hani Elezit .

Drejtori rajonal i policisë, nënkoloneli Basri Shabani, ka falënderuar pjesëtarët e KFOR-it amerikan që kanë mundësuar realizimin e kësaj ligjërate,  të dobishme për pjesëtarët e Policisë së Kosovës – rajoni i Ferizajt dhe me këtë rast është zotuar për bashkëpunim të ndërsjellë edhe në të ardhmen, duke përfshirë edhe shkëmbimin e përvojave dhe trajnimeve, me qëllim të avancimit të mëtejmë të policisë rajonale të Ferizajt, për trajtimin e rasteve të dhunës në familje, që policia në mënyrë sa më profesionale t’i trajtojë viktimat e dhunës në familje, dukuri kjo që po e përcjellë shoqërinë tonë.